اسلام آباد۔7دسمبر (اے پی پی): سپریم کورٹ سندھ اچ گھٹ توں گھٹ اجرت 25 ہزار مقرر کرݨ دے خلاف حکم امتناع ݙیندے ہوئیں قرار ݙتے جو سندھ کابینہ 25 جون کوں صوبہ اچ 25 ہزار روپے گھٹ توں گھٹ اجرت مقرر کیتی، نجی صنعت دے وکیل دا موقف اے جو سندھ اچ مقرر کیتی ڳئی گھٹ توں گھٹ اجرت دا طریقہ کار آئین دے منافی اے،عدالت حتمی فیصلے اچ حکم امتناع واپس ڳھدا تاں درخواست گزار سارے مہینے دی اجرت ادا کریسن ۔ عدالت عظمیٰ اٹارنی جنرل آف پاکستان تے ایڈوکیٹ جنرل سندھ کوں نوٹسز جاری کریندے ہوئیں قرار ݙتے جو اٹارنی جنرل اتے ایڈوکیٹ جنرل سندھ گھٹ توں گھٹ اجرت مقرر کرݨ دے طریقہ کار تے عدالت دی معاونت کرن۔ منگل کوں جسٹس قاضی فائز عیسیٰ دی سربراہی اچ ݙو رکنی بینچ سندھ اچ گھٹ توں گھٹ اجرت 25 ہزار مقرر کرݨ دے خلاف دائر درخواستاں تے سماعت کیتی ۔ دوران سماعت درخواست گزرا نجی صنعت دے وکیل دلائل ݙیندے ہوئیں موقف اپنائے جو سندھ ویج بورڈ گھٹ توں گھٹ اجرت 19 ہزار کرݨ دی سفارش کیتی ہئی ، وزیر اعلیٰ سندھ سفارش دے برعکس گھٹ تو گھٹ اجرت 25 ہزار مقرر کرݙتی ،قانون دے مطابق وزیر اعلیٰ سندھ یا صوبائی حکومت کنے خود توں اجرت ودھاوݨ دا اختیار کائنی باقی صوبیں اچ گھٹ توں گھٹ اجرت 20 ہزار اتے سندھ اچ 25 ہزار اے،سندھ دی انڈسٹری کیتے 25 ہزار اجرت ݙیوݨ ممکن کائنی ۔ جسٹس قاضی فائز عیسیٰ ریمارکس ݙتے جو صوبائی خود مختاری دی ڳال وی تاں کیتی ویندی اے۔ عدالت عظمیٰ سندھ اچ گھٹ توں گھٹ اجرت 25 ہزار مقرر کرݨ دے خلاف حکم امتناع ݙیندے ہوئیں معاملہ تے سماعت جنوری 2022ء تئیں ملتوی کرݙتی ۔
.jpg)
.jpg)
