اسلام آباد ۔ 8 جون (اے پی پی) وزیراعظم عمران خان کورونا وائرس توں بچنڑ کیتے احتیاطی تدابیر تے سختی نال عمل کرنڑ دی ضرورت تے زور ڈیندے ہوئیں آکھیے جو ایس او پیز تے عمل درآمد نال وائرس دے کھنڈنڑ کوں گھٹ کیتا ونج سگدے ، ملک اچ جولائی دے چھیکڑ تے اگست دے شروع اچ وبا دا دباﺅ اچی سطح تے ہوسی ، کورونا وائرس توں بچنڑ کیتے گھر توں ماسک پاتے ماہر نکلیا ونجے ، بے احتیاطی بزرگاں تے بئے لوکاں دی زندگی خطرے اچ پا سگدی اے ۔ اے گال انہاں سنوار کوں کورونا وبا متعلق گال مہاڑ کریندے ہوئیں آکھی اے ۔ وزیراعظم آکھیے جو لاک ڈاﺅن دے دوران ملک اچ اوکھی صورت حال دا سامنڑاں کرنڑاں پئے ، ڈیہاڑی دار تے مزدور طبقہ اوکھے ویلھے توں گزردا پئے ۔ انہاں آکھیے جو ڈاﺅن دا مطلب کورونا وائرس کوں گھٹ کھنڈنڑ ڈتا ونجے ، لاک ڈاﺅن توں کورونا کڈاہیں نی مکدا ، امریکہ اچ ایں وبا پاروں ہک لکھ لوک ہلاک تھئن تاں جو انہاں وی لاک ڈاﺅن ختم کرڈتے ، امیر ملک وی ایں نتیجے تے پجن جو لاک ڈاﺅن دا مسئلہ حل کائنی ۔ انہاں آکھیے جو حکومت ولوں جاری کیتے گئے ایس او پیز تے عمل درآمد نال ہی وائرس گھٹ کھنڈ سگدے ۔ماسک پاونڑ نال وائرس 50فیصد گھٹ کھنڈدے ۔وزیراعظم آکھیے جو کورونا وباءتکھے کھنڈسے تاں ہسپتالاں تے دباﺅ ودھ ویسی ، صحت دیاں بہتر سہولتاں ڈیونڑ نال ایں وبا تے قابو پاتا ونج سگدے ، انہاں آکھیے جو اساڈے خیال اچ جولائی دے چھیکڑ یا اگست دے شروع اچ کورونا اچی سطح تے ہوسی اساڈی کوشش اے جو ڈھائی مہینے اچ صورت حال قابو اچ رہے تے ملک کوں اوکھی صورت حال توں بچایا ونجے ۔ انہاں آکھیے جو اجوکے مہینے دے چھیکڑ تئیں آکسیجن توں لیس ہک ہزار بیڈز دا بندوبست کرگھنسوں، پاک نگہبان ویب سائٹ تے سارے شہراں اچ بیڈز دی دستیابی متعلق سارے اعداد و شمار موجود ہن۔ انہاں آکھیے امید اے سارے لوک ایں صورت حال تے توجہ کریسن ، انہاں ایس او پیز تے سنجیدگی نال عمل کروں ، ملک کوں اوکھی صورت ھال توں بچا گھنسون جیویں بئے ملکاں اچ صورت حال اے ، برازیل اچ ایں وباءتوں روزانہ 1500 اتے امریکہ اچ 2 ہزار دے نیڑے لوک مردن جداں جو اساڈے ملک اچ ترائے مہینے اچ 2ہزار لوک جاں بحق تھئن ، پاکستان امریکہ تے یورپ وانگوں متاثر کائنی تھیا ۔
