اسلام آباد-29 جولاءِ (اي پي پي) وفاقي وزير خواجه محمد آصف ۽ احسن اقبال چيف جسٽس قاضي فائز عيسيٰ خلاف چڙڏياريندڙ پروپيگنڊا ۽ قتل جي فتويٰ جي مذمت ڪندي چيو آهي ته اهڙن آوازن خلاف رياست فيصلائتي ڪارروائي ڪندي، ڪنهن گروهه جي سياسي مفادن جي بنياد تي رياست ڪنهن به صورت ۾ ڊڪٽيشن قبول نه ڪندي، هر خاص ۽ عام کي ٻڌائڻ چاهيون ٿا ته رياست ڪنهن کي ڪنهن جي قتل جي فتويٰ جاري ڪرڻ جي اجازت نه ڏيندي ۽ نه ئي حڪومت اهڙي طرح جي روين جي اجازت ڏيندي، ملڪ ۾ وڳوڙ ۽ ڏڦيڙ پکيڙيندڙن کي سختي سان منهن ڏنو ويندو. هو پي ٽي وي هيڊڪوارٽرز ۾ گڏيل پريس ڪانفرنس کي خطاب ڪري رهيا هئا. بچاءَ واري وزير خواجه محمد آصف چيو ته اڄ هڪ گروهه طرفان بي بنياد پروپيگنڊا شروع ڪئي وئي، قاضي فائز عيسيٰ جي حوالي سان جيڪا ڳالهه ڪئي وئي آهي، ماضي ۽ ويجهي ماضي ۾ بار بار ان ڳالهه جي وضاحت ڪئي وئي آهي ته قاضي فائز عيسيٰ جو ڪنهن فيصلي يا بيان سان ڪو به تعلق ناهي، اهو ڪجهه ماڻهن جي سياسي مفادن سان جڙيل آهي، اهي بار بار ان مسئلي کي هوا ڏئي رهيا آهن، پاڪستان ۾ مذهب جي نالي تي رتوڇاڻ جي ڪوشش ڪئي پئي وڃي، سپريم ڪورٽ به ان حوالي سان وضاحت ڪري چڪي آهي، ان حوالي سان پروپيگنڊا بدستور جاري آهي. هن چيو ته هر خاص ۽ عام کي ٻڌائڻ چاهيون ٿا ته رياست ڪنهن کي ڪنهن جي قتل جي فتويٰ جاري ڪرڻ جي اجازت نٿي ڏي، رياست ۾ جيڪڏهن اهڙي طرح کليل موڪل ڏني وئي ته رياست جي رٽ نه رهندي، سياسي ۽ ٻين مفادن کي نظر ۾ رکندي سوشل ميڊيا ۾ عوام کي قتل تي ڀڙڪائڻ جي ڪوشش ڪئي پئي وڃي. انتهاپسنداڻيون پوسٽون سوشل ميڊيا تي لڳايون پيون وڃن، حضور صلي الله عليه وآله وسلم ٻنهي جهانن لاءِ رحمت اللعالمين بڻجي آيا، اهڙو مذهب جيڪو رحمت ۽ برڪتن جو مذهب آهي ۽ ان ۾ اهڙي قسم جي فتوائن جي ڪا به گنجائش ناهي، اهو سڀ ڪجهه ڪوڙ تي ٻڌل آهي، رياست ان تي ايڪشن کڻندي. قانون پنهنجي پوري قوت سان حرڪت ۾ ايندو، اهڙين شين جي قطعي اجازت نه ڏني ويندي. هن چيو ته ختم نبوت اسان جي ايمان جو حصو آهي، سمورن مسلمانن کي ان ڳالهه جو ورجاءُ ڪرڻو پوي ته سمجهو ته معاشري ۾ ڪا اهڙي ڪمزوري ضرور آهي جنهن سبب پنهنجي ايمان جي ظاهري حيثيت کي بار بار اجاگر ڪرڻو پئجي رهيو آهي، ايمان پنهنجي عملن مان ظاهر ٿيڻ گهرجي ۽ ماڻهو اوهان جي پيروي ڪن. هن چيو ته اسلام محبت ۽ يگانگت جو پيغام ڏيندڙ مذهب آهي ۽ اسلام جو اهو چهرو سڄي دنيا کي ڏيکاريو وڃي. بچاءَ واري وزير چيو ته چيف جسٽس قاضي فائز عيسيٰ خلاف ڪافي عرصي کان سازش هلي رهي آهي، اسان جون عدالتون آئين موجب فيصلا ۽ آئين جي تشريح ڪري رهيون آهن، آئين جي حڪمراني ۽ انصاف جو مان مٿانهون هجڻ گهرجي. هڪ سوال جي جواب ۾ بچاءَ واري وزير چيو ته هر شخص مذهب کي استعمال ڪري پنهنجو سياسي دڪان چمڪائڻ چاهي ٿو، ان جي اجازت نه ڏني ويندي، اهڙي طرح جي فتويٰ ۽ هڪ ڪروڙ روپين جو اعلان ڪرڻ کان وڌيڪ ڪريل حرڪت نٿي ٿي سگهي، ان خلاف ايڪشن سڀني کي نظر ايندو. هن چيو ته گذريل ڌرڻي بابت قاضي فائز عيسيٰ جي فيصلي کانپوءِ کيس ۽ سندس وارثن کي ٽارگيٽ ڪيو ويو، ان خلاف ريفرنس ۾ اڳوڻي حڪومت کي شرمندگي ٿي. هن چيو ته 100 سيڪڙو ڪوڙ جي بنياد تي چيف جسٽس قاضي فائز عيسيٰ خلاف فتويٰ ڏني وئي ۽ هڪ ڪروڙ روپين جو انعام مقرر ڪيو ويو، ان سان پوري دنيا ۾ پاڪستان جو ڪنڌ شرم وچان جهڪي ويو. هن چيو ته اسان کي حڪومت ۽ قوم جي حيثيت سان هڪ موقعو مليو آهي ته رياست خلاف ان طرح جو سلسلو بند ڪيو وڃي، ماضي ۾ جيڪي ڪوتاهيون ٿيون آهن انهن جي ازالي جو وقت آهي ته جيئن ماڻهو رياست کي مذاق نه سمجهن، قانون جيڪو مخصوص استعمال ڪيو وڃي ته اهو قانون، قانون نٿو رهي. رٿابندي، ترقي، سڌارن ۽ خصوصي قدمن واري وفاقي وزير پروفيسر احسن اقبال چيو ته چيف جسٽس آف پاڪستان سپريم ڪورٽ جو سربراهه آهي ۽ سپريم ڪورٽ اهم رياستي ٿنڀ آهي. چيف جسٽس بابت بيان پاڪستان جي آئين ۽ دين سان کليل بغاوت آهي. هن چيو ته هي اهو طبقو آهي جنهن کي 2018ع ۾ خاص مقصد لاءِ بيهاريو ويو. هن چيو ته جيڪو شخص ماڻهن کي ايمان تي فتويٰ جاري ڪري ٿو اهو الله جي ڪم کي پنهنجي هٿ ۾ کڻي ٿو. پاڪستان ۾ آئين، عدالتون ۽ قانون موجود آهن ۽ ڪنهن شخص يا گروهه کي اها اجازت نه آهي ته هو ڪنهن جي قتل جي فتويٰ جاري ڪري. سزا ۽ جزا جو اختيار صرف عدالت وٽ هوندو آهي. هن چيو ته چيف جسٽس کي ڌمڪي ڏيڻ آئين سان کليل بغاوت آهي، دهشتگردي، خودڪش حملا ۽ ان قسم جي فتويٰ بازي جو اسلام سان ڪو به تعلق ناهي. انهن عنصرن خلاف قانون پوري قوت سان حرڪت ۾ ايندو. هن وقت مسلمانن کي متحد ڪرڻ جي ضرورت آهي. ملڪ ۾ فساد ۽ انتشار پکيڙيندڙن کي سختي سان منهن ڏنو ويندو. ڪنهن کي مذهب جو ٺيڪيدار نه ٿيڻ گهرجي. هن چيو ته چيف جسٽس آف پاڪستان قاضي فائز عيسيٰ خلاف ڪنهن جو سرعام اهو اعلان ڪرڻ ته جيڪو ان جو سر قلم ڪري ان کي هڪ ڪروڙ جو انعام ڏيندس، آئين ۽ دين سان کليل بغاوت آهي. هن چيو ته ڪنهن مسلمان کي پنهنجي عقيده ختم نبوت صلي الله عليه وآله وسلم جي لاءِ ڪنهن پارٽي کان سرٽيفڪيٽ وٺڻ جي ضرورت ناهي. ڪنهن جي ايمان جو فيصلو انسانن کي ناهي ڪرڻو، هي اهو ڪم آهي جيڪو خدا کي قيامت ڏينهن ڪرڻو آهي. جيڪو شخص ماڻهن جي ايمان تي فتويٰ جاري ڪري ٿو ته اهو خدا جي ان ڪم کي پنهنجي هٿ ۾ کڻي ٿو. پاڪستان ۾ آئين، عدالتون ۽ قانون آهن، هتي ڪنهن کي اجازت نه آهي ته هو ڪنهن جي قتل جي فتويٰ جاري ڪري، ڇاڪاڻ ته سزا ۽ جزا جو اختيار صرف عدالتن وٽ آهي. احسن اقبال چيو ته پاڪستان جي عالم سڳورن گڏجي پيغام پاڪستان جي صورت ۾ ان رويي جي مذمت ڪئي هئي. انهن جي فتويٰ موجود آهي ته دهشتگردي، خودڪش حملا ۽ ان قسم جي فتويٰ بازي جو اسلام سان تعلق ناهي، ان جو اختيار صرف رياستي ادارن وٽ آهي. احسن اقبال چيو ته هتي ماڻهن کي مذهب جي نالي تي ڀڙڪايو ويو ته هو فتويٰ ڏين. سيالڪوٽ ۾ سريلنڪن شخص جي قتل تي پوري قوم کي شرمندگي برداشت ڪرڻي پئي، اهڙي طرح جڙانوالا، سوات ۽ ٻين هنڌن تي ماڻهن کي سياست چمڪائڻ لاءِ ڀڙڪايو ويو، حڪومت ان طرح جي روين کي وڌڻ جي اجازت نه ڏيندي. ڪنهن کي به اهو حق حاصل ناهي ته هو ڪنهن جي ايمان جو فيصلو ڪري.
.jpg)
.jpg)
