9 مئي ڪيس جي فيصلي سان انصاف جو مان مٿانهون ٿيو آهي، ملڪ دشمنن جو خواب پورو ڪندڙن کي سزائون ڏنيون ويون: عطاءُ الله تارڙ

اسلام آباد – 26 – ڊسمبر (اي پي پي) اطلاعات، نشريات، قومي ورثي ۽ ثقافت واري وفاقي وزير عطاءُ الله تارڙ چيو آهي ته 9 مئي ڪيس جي فيصلي سان انصاف جو مان مٿانهون ٿيو آهي، ملڪ دشمنن جو خواب پورو ڪندڙن کي سزائون ڏنيون ويون، فيصلي جي آجيان ڪريون ٿا، 9 مئي جي ماسٽر مائنڊ ۽ منصوباسازن کي به سزائون ملڻ گهرجن. صحافين سان ڳالهائيندي اطلاعات واري وفاقي وزير چيو ته 26 ڊسمبر تي ملٽري ڪورٽ 9 مئي سانحي جي ڏوهارين کي باقاعده سزائون ٻڌايون، 9 مئي تي لاهور جناح هائوس، پي اي ايف ميانوالي، راولپنڊي، قلعه چڪدره جي جوابدارن جا تفصيل سامهون آيا آهن. هن چيو ته ملڪ جي دفاعي ادارن کي ڪمزور ڪرڻ ۽ ملڪي دفاعي ٺڪاڻن تي حملا باني چيئرمين پي ٽي آءِ ۽ سندس ساٿين جي ڪڌي سازش هئي، انهن 9 مئي جي منصوباسازي ۾ حصو وڌو. هن چيو ته اڄ تمام وڏو ڏينهن آهي، اڄ 60 ڏوهارين جو ڪيس منطقي انجام تي پهتو آهي. وفاقي وزير چيو ته ان ڪيس جو فيصلو جلدي ۾ ناهي ٿيو، ان ۾ ٻه سال جو وقت لڳو، ان ڪيس ۾ باقاعده ثبوت جمع ڪرايا ويا. جن ڏوهارين کي سزائون مليون هي اهي ماڻهو هئا جن 9 مئي تي ڀڃ ڊاهه ۽ جلاءُ گهيراءُ ڪيو، سيڪيورٽي اهلڪارن تي تشدد ڪيو، گهر جي اندر گهڙي ٽي وي ٽوڙيا، ورديءَ جي بي حرمتي ڪئي، گيٽ ٽوڙيا، باهه لڳائي ۽ ملڪ دشمنن جو خواب پورو ڪرڻ جي ڪوشش ڪئي. اطلاعات واري وفاقي وزير چيو ته انهن ڏوهارين جي ٽرائل ۾ سمورن قانوني گهرُجن کي پورو ڪيو ويو، اسان ان فيصلي جي آجيان ڪريون ٿا، اڄ انصاف جو مان مٿانهون ٿيو آهي، هاڻي ڪير جرئت نه ڪندو ته اهو دفاعي ٺڪاڻن تي حملي آور ٿي دشمنن جو خواب پورو ڪري. هن چيو ته ملٽري ڪورٽ ۾ ٽرائل عالمي معاهدن، اسان جي قانون ۽ آئين جي عين موجب آهي. رائيٽ ٽو فيئر ٽرائل ۾ وڪيل ڪرڻ، فيملي ۽ رڪارڊ تائين پهچ جو حق ڏنو ويو جڏهن ته اهو به طئي آهي ته ڏوهاري ج ي غيرموجودگي ۾ ٽرائل نه ٿيندو. ان ڪيس ۾ اپيل جا به حق ڏنا ويا آهن، اپيل جو هڪ حق ملٽري ڪورٽ جڏهن ته ٻيو حق لاڳاپيل هاءِ ڪورٽ ۾ رٽ پٽيشن جي ذريعي ڏنو ويو آهي. هن چيو ته 9 مئي جو ڏوهه ايترو وڏو ڏوهه هو جو ان کان ڪير لڪي يا ڀڄي نه ٿو سگهي، ثبوتن ۾ ڏسي سگهجي ٿو ته ڪير ڪير واقعي واري جڳهه تي موجود هو، ڪير اندر ويو، ڪنهن جلاءُ گهيراءُ ۽ ڀڃ ڊاهه ڪئي. وفاقي وير چيو ته ستم ظريفي ته اها آهي جو پي اي ايف بيس ميانوالي جي ٻاهران ايم ايم عالم جي جهاز کي به ساڙيو ويو. ان جهاز تي اسان فخر ڪريون ٿا ته اسان جي هڪ پائلٽ دشمن جا جهاز ڪيرائي عالمي رڪارڊ قائم ڪيو. هن چيو ته 9 مئي سانحي جي ڏوهارين دفاعي ٺڪاڻن کي باهه لڳائي. عطاءُ الله تارڙ چيو ته اڄ پاڪستان جي دفاع ۽ سلامتي جي لاءِ تمام وڏو ڏينهن آهي، اهي سمورا ماڻهو جيڪي 9 مئي سازش ۾ شامل هئا جن جلاءُ گهيراءُ ڪيو، انهن سڀني کي سزائون ٻڌايون ويون آهن. هن مطالبو ڪيو ته ان سازش جي ماسٽر مائنڊ ۽ ٻين منصوبا سازن کي به منطقي انجام تائين پهچايو وڃي ۽ انهن جو به ٽرائل مڪمل ڪيو وڃي. وفاقي وزير چيو ته پي ٽي آءِ جي ڪجهه اڳواڻن باني چيئرمين جي 9 مئي تي جلاءُ گهيراءُ جي فيصلي سان اختلاف به ڪيو هو پر ان جي باوجود ڏوهارين اهو ڪم ڪيو، انهن جي موبائيل فون جي لوڪيشن ۽ موقعي تي موجودگي ثابت آهي، هر شيءَ واضح آهي ته اهي حملي آور هئا، انهن جلاءُ گهيراءُ ۽ ڀڃ ڊاهه ڪئي. انهن ڏوهارين جا نه رڳو وڊيو ثبوت موجود آهن پر ٽيڪنيڪل ثبوت به موجود آهن، ڪئميرا جي اک کان ڪير بچي نه ٿوس گهي. هي اهي ماڻهو هئا جن دشمنن جو خواب پورو ڪيو ۽ اڄ به انهي بيانيي تي عمل پيرا آهن. هن چيو ته اڄ قانون جو مان مٿانهون ٿيو آهي، ملڪ ۾ قانون جي حڪمراني هوندي ۽ اڳتي ڪير به جرئت نه ڪندو ته هو ملڪ ۾ انارڪي ڦهلائي ۽ دفاعي ٺڪاڻن ۽ قومي سلامتي جي علامتن کي نقصان پهچائي. هن چيو ته اڄ شهيدن جا روح پرسڪون هوندا، جن ماڻهن انهن جي يادگارن کي مسمار ڪيو ۽ تشدد ۽ انتشار جو رستو اختيار ڪيو، اڄ انهن کي سزائون ٿيون ۽ اهي منطقي انجام تي پهتا. هاڻي ڪير ملڪ طرف ميري اک سان نه ڏسي سگهندو، رياست پاڪستان مضبوط ٿيندي، آئين جي بالادستي ٿيندي. هن چيو ته اڄ ته باني چيئرمين پي ٽي آءِ به چئي ڇڏيو ته معيشت مستحڪم ٿي رهي آهي. هن چيو ته انشاءَ الله پاڪستان کي وڌيڪ مضبوط بڻائينداسين.

مضمون کا ماخذ : لاٹری کے سستے ٹکٹ

متعلقہ مضامین