معاشري جا سمورا طبقا، عالم، استاد، صحافي، وڪيل، واپاري، سياسي ۽ سماجي اڳواڻ ۽ ادارا ملڪ ۾ گستاخانا مواد جي روڪٿام جي مهم ۾ پنهنجو ذميواراڻو ڪردار ادا ڪن: مذهبي معاملن ۽ بين المذاهب هم آهنگي واري وزارت

اسلام آباد – 13 – جولاءِ (اي پي پي) مذهبي معاملن ۽ بين المذاهب هم آهنگي واري وزارت گستاخانا ۽ اڻوڻندڙ مواد جي حوالي سان سوشل ميڊيا جي مجرماڻي استعمال کي روڪڻ بابت مناسب آگاهي جي سخت ضرورت کي اجاگر ڪندي ان ڳالهه تي زور ڏنو آهي ته معاشري جا سمورا طبقا خاص طور تي عالم سڳورا، استاد، صحافي، وڪيل، واپاري، سياسي ۽ سماجي اڳواڻ ۽ ادارا ملڪ ۾ گستاخانا مواد جي روڪٿام جي مهم ۾ پنهنجو ذميواراڻو ڪردار ادا ڪن، اهڙي مواد جي خاتمي لاءِ هر حالت ۾ قانون جو رستو اختيار ڪندي ايف آءِ اي سائبر ڪرائيم جي لاڳاپيل ٿاڻي ۾ رپورٽ داخل ڪرائي وڃي. مذهبي معاملن واري وزارت پاران جاري تفصيل موجب شرپسند عنصرن گذريل ڪيترن ئي سالن کان اسان جي نوجوان نسل جي اخلاق، ڪردار ۽ عقيدن کي تباهه ڪرڻ جي لاءِ سوشل ميڊيا جي ذريعي هڪ منظم مهم شروع ڪري رکي آهي. اسان جي معاشري ۾ سوشل ميڊيا جي منفي ۽ مضر اثرن جو گهر ڪري وڃڻ پوري قوم جي لاءِ فڪر جو لمحو آهي. بي حيائتي بذات خود ناقابل برداشت آهي پر هاڻي معاملو توهين تائين وڃي پهتو آهي جيڪا انتهائي سنگين صورتحال آهي. وزارت موجب ملڪ ۾ انتهائي منظم طريقي سان سوشل ميڊيا جي ذريعي الله رب العزت، رسول اڪرم ، اهل بيت اطهار، امهارت المومنين، اصحاب رسول رضه، قرآن پاڪ ۽ قومي جهنڊي جي توهين ڪئي پئي وڃي، مقدس ترين شخصيتن جا نالا انتهائي توهين آميز انداز ۾ شايع ڪيا وڃن ٿا. ان حوالي سان تصويرون ۽ وڊيوز ٺهن ٿيون جن کي مخصوص ايپس تي ۽ مخصوص گروپن ۾ شيئر ڪيو وڃي ٿو. مذهبي معاملن واري وزارت موجب ان حوالي سان ايف آءِ اي سائبر ڪرائيم انهن ڏوهن ۾ ملوث هيستائين جن ماڻهن کي گرفتار ڪيو آهي، انهن ۾ ڊاڪٽرز، پروفيسرز، انجنيئرز، چارٽرڊ اڪائونٽنٽ، وڪيل ۽ زندگي جي مختلف شعبن سان تعلق رکندڙ ماڻهو موجود آهن. وزارت موجب لاهور هاءِ ڪورٽ راولپنڊي بئنچ ۾ ايف آءِ اي سائبر ڪرائيم جي جمع ڪرايل رپورٽ ۽ ليگل ڪميشن جي تحقيق موجب پاڪستان ۾ چار لک کان وڌيڪ اڪائونٽ سوشل ميڊيا تي اهڙي سنگين گستاخي ۾ ملوث آهن. سوشل ميڊيا جي ذريعي بي حيائي کي فروغ ڏنو پيو وڃي ۽ بي حيائي جي ذريعي نئين نسل کي گستاخي جي ڌٻڻ ۾ ڌڪيو پيو وڃي. وزارت موجب ملڪ ۾ هن وقت 10 ڪروڙ کان وڌيڪ ماڻهو سوشل ميڊيا استعمال ڪري رهيا آهن. اها برائي ڪيتري تيزي سان پکڙجي رهي آهي ان جو اندازو ان ڳالهه مان ڪري سگهجي ٿو ته 2019ع ۾ 4 ماڻهن گڏجي بلاسفيمي جو گروپ ٺاهيو. 2022ع ۾ ايف آءِ اي سائبر ڪرائيم انهن چئن کي گرفتار ڪري ورتو پر جڏهن اهي گرفتار ٿيا ته ان گروپ جي ميمبرن جي انگ ۾ قابل قدر اضافو ٿي چڪو هو ۽ اهو اضافو اڃا تائين جاري آهي جنهن جو بنيادي مقصد پاڪستان ۾ فساد برپا ڪري امن امان جو مسئلو پيدا ڪرڻ آهي ته جيئن ملڪ جي ترقي جو ڦيٿو رڪجي وڃي ۽ هن ملڪ کي گهرو ويڙهه طرف ڌڪيو وڃي. وڌيڪ اهو ته مذهب ۽ مذهب کي مڃيندڙن جي وچ ۾ نفرتون پيدا ڪيون وڃن. هڪ مذهب يا مسلڪ سان هڪجهڙائي رکندڙ نالي جي اڪائونٽ سان ان جي مخالف مذهب يا مسلڪ جي توهين منظم سازش جي ذريعي ڪئي پئي وڃي. وزارت ان ڳالهه تي زور ڏنو ته موجوده حالتن ۾ والدين جي ذميواري سڀ کان وڌيڪ اهم آهي، جيڪي والدين پنهنجي ٻارن کي موبائيل، ليپ ٽاپ ۽ انٽرنيٽ جي سهولت مهيا ڪن ٿا، اهي ان ڳالهه تي به نظر رکن ته انهن جا ٻار سوشل ميڊيا تي ڇا ڏسن ٿا ڪٿي ائين نه ٿئي جو ٻار ناداني ۾ بي حيائي جي رستي تي هلي پوي ۽ فحش وڊيوز تان ٿيندي خدانخواسته گستاخي تائين وڃي پهچي. ان وبا کي ڪنٽرول ڪرڻ جي لاءِ ضروري آهي ته جتي والدين کي انهن حالتن کان آگاهه ڪيو وڃي اتي معاشري کي تعليم ڏني وڃي ته اهڙي مواد جي ڪهڙي طرح به تشهير نه ٿيڻ گهرجي ۽ ان جي خاتمي لاءِ هر حالت ۾ قانون جو رستو اختيار ڪيو وڃي ته جيئن معاشري ۾ قانون جي حڪمراني سان گڏ اهڙي قسم جي ڏوهن جو خاتمو ٿي سگهي. ايف آءِ اي سائبر ڪرائيم هيستائين 140 ماڻهو گرفتار ڪيا آهن جنم ان 11 ماڻهن کي هيستائين ٽرائل ڪورٽ موت جي سزا جو فيصلو ٻڌائي چڪي آهي. 2 ماڻهن کي موت جي سزا هاءِ ڪورٽ کان به ڪنفرم ٿي چڪي آهي. سڄي ملڪ ۾ ايف آءِ اي سائبر ڪرائيم جا 15 ٿاڻا آهن، انهن سمورن ٿاڻن ۾ بلاسفيمي سيل قائم ٿي چڪا آهن. مذهبي معاملن واري وزارت اپيل ڪئي ته جتي به سوشل ميڊيا تي گستاخي جو مواد نظر اچي ته ايف آءِ اي سائبر ڪرائيم جي لاڳاپيل ٿاڻي ۾ رپورٽ داخل ڪرائين. سمورن ٿاڻن ۾ بلاسفيمي سيل ايڪٽو آهي ۽ اهڙي درخواست تي فوري طور تي ڪارروائي ڪئي وڃي ٿي. گستاخي ڪندڙ ڏوهاري ڪا به ايپ استعمال ڪري رهيو هجي، ڪنهن به ويب سائيٽ تي گستاخانا مواد شيئر ڪري رهيو هجي يا ڪا وي پي اين استعمال ڪري رهيو هجي ان کي سائبر ڪرائيم ٽيڪنالاجي جي ذريعي ٽريس ڪري ٿي ۽ ان کي گرفتار ڪري قانون موجب ڪارروائي ڪئي وڃي ٿي. جيڪڏهن ان سلسلي ۾ ڪا رڪاوٽ يا مشڪل پيش اچي ته ايف آءِ اي کي قانوني ڪارروائي جي لاءِ 111345786 – 051 نمبر تي شڪايت داخل ڪرائي سگهجي ٿي جڏهن ته گستاخانا مواد کي بلاڪ ڪرائڻ جي لاءِ پي ٽي اي/ ايف آءِ اي سان http://complaint.pta.gov.pk/[email protected] لنڪ تي رابطو ڪري سگهجي ٿو.

مضمون کا ماخذ : بہت سے نتائج

متعلقہ مضامین